Як овозхони зодаи Тоҷикистон дар озмуни имсолаи Eurovision (Евровидение), ки моҳи май баргузор хоҳад шуд, аз Русия намояндагӣ мекунад.

Расонаҳои Русия рӯзи 8-уми март навиштанд, Манижа Сангин дар Роттердам таронаи Russian Woman-ро хоҳад хонд. Соли гузашта бояд гуруҳи Little Big дар "Евровидение" Русияро намояндагӣ мекард, вале бо сабабаи пандемия коронавирус озмун баргузор нашуд.

Манижа Сангини 30-сола дар Маскав зиндагӣ мекунад ва бештар бо таронаву фаъолиятҳои иҷтимоиаш машҳур аст. Яке аз таронаҳои маъруфи ӯ дар бораи муҳоҷирон – "Недославянка" – аст, ки тақрибан ду сол пеш муаррифӣ шуд ва шароиту эҳсосоти пурчолиши як муҳоҷирро дар Русия дар шеваи танзу фоҷиа баён кард.

Айни замон худи ӯ сафири ҳусни нияти намояндагии Оҷонси Созмони Милал дар умури паноҳандагон ё UNHCR дар Русия аст.

Манижа Сангин дар охири соли 2019 дар суҳбате бо Радиои Озодӣ ба чанд суол посух гуфта буд, ки ҳоло нашри дубораи баъзе аз қисматҳои онро аз манфиат холӣ намедонем.

Радиои Озодӣ: Ҳуввияти Шумо чӣ мегӯяд: Тоҷикед, рус ҳастед ё каси дигар?

Манижа: Ман шаҳрванди Сайёра ҳастам. Ман ҳам тоҷик, ҳам славянӣ, ҳам одаме ҳастам, ки ба англисӣ суҳбат мекунад. Ман кайҳо тамғагузориро бас кардам. Бад мебинам, вақте одамон тамға мегузоранд ва худро маҳдуд мекунанд. Мехоҳам, мутобиқи фарҳангу суннатҳое, ки дар ман ташаккул ёфтааст, зиндагӣ кунам. Ин фарҳанг ба шарофати тамоми чизҳое, ки дар зиндагии ман рух додааст, ташаккул ёфтааст.

Радиои Озодӣ: Арзишҳо ҳам муҳим будагист? Медонам, ки модаратон дар ташккули шахсияти Шумо нақши муҳим бозидаанд?

Манижа: Нақши муҳим бозидаанд. Ба фикрам, ин кори хеле мушкил аст, ки кӯдакро дар як кишвари бегона бузург бикунӣ. Модарам панҷ кӯдакро бузург карданд ва муҳимтарин хидмати он кас ҳамин аст, ки ба ҳамаи мо иҷоза доданд, кореро, ки дили мо мехоҳад, бикунем. Чунки, мутаассифона, волидони ман маҷбур шуданд аз орзуву манфиатҳои худ бигузаранд. Ҷанг аз бисёр чиз маҳрум кард. Барои ҳамин, бисёр шодам, ки суруд иҷро мекунам, эҷодкор ҳастам, зери боли модар ҳастам, таҳти назари касбии он кас кор мекунам. Он кас ҳамчун як продюсер бисёр чизҳоро беҳтар аз дигарон дарк мекунанд. Дар ҳар тим доштани чунин як узве хеле муҳим аст.

Радиои Озодӣ: Корҳои Шумо бештар хусусияти иҷтимоӣ доранд, чандон тафреҳӣ нестанд. Вале чӣ назар доред, садои Шумо шунида мешавад?

Манижа: Бале, ман инро бо чашми сар мебинам. Номаҳои зиёд мегирам. Мухотабони ман хеле дигаргун шудаанд. Ин чизест, ки ман давоми солҳои зиёд мехостам. Ин танҳо як идеяи муваққатии яксола нест. Аз оғози фаъолиятам ҳаминро мефаҳмидам, ки аввал бояд барои худ тамошобин пайдо кунам, то тавонам баъд аз ин дар бораи гапҳои муҳим суҳбат кунам. Яъне аввал дар бораи он чӣ, ки маро ташвиш медиҳад мегӯяму баъдан дар бораи дигарҳо. Дар маҷмуъ, тамоми кору барномаҳое, ки имсол аз дастам омаду иҷро кардам, як пирӯзӣ аст. Худо кунад, ки соли оянда аз ин ҳам бештар талош бикунам.

Радиои Озодӣ: Дар Русия тоҷикони зиёд кору зиндагӣ мекунанд ва мушкилашон кам нест. Оё барои он ки як тоҷик ҳастед, дар Русия азият шудаед?

Манижа: Албатта, буданд чунин ҳолатҳо, чаро пинҳон кунам? Вале ман аз ин мавзуъ фоҷиа сохтанӣ нестам. Бешубҳа, барои ҳама мардум дар зиндагӣ мушкил эҷод мешавад. Вале бояд сари худамон кор кунем, бояд таҳсил кунем, чунки ин хеле муҳим аст. Имкони таҳсилу гирифтани маълумот ҳамеша вуҷуд дорад. Зимнан, ман ба клипам аз Тоҷикистон чандин вокуниш дарёфт кардам. Бархе мегӯянд, ки "ту моро масхара мекунӣ". На, ба ҳеҷ сурат ман масхара накардам. Ман ҳамаи мушкилотеро, ки муҳоҷирон дучор мешаванд, хуб дарк мекунаму боэҳтиром муносибат мекунам. Чунки ман медонам, ки ин чӣ мушкил аст ва оилаи мо ҳам зиндагиро дар ин ҷо аз сифр шурӯъ карда буд. Ман ҳоло ҳақ дорам, ки як оҳи сабук бикашам, чунки оилаи ман дар ҳолате нест, ки дар ғами бурдаи ноне бошад. Ман метавонам бинишинаму фикр кунам, ки чӣ гуна метавонам онҳоеро, ки ҳамарӯза зӯр мезананд, барои зиндагии беҳтаре ташвиқ кунам. Бисёри онҳо ба як ҳарфи гарму дастгирӣ ниёз доранд, ба як калима гап, ки "ғам нахӯр, ҳамааш хуб мешавад, табассум кун. Ин тарона дар бораи ту аст ва ба зудӣ ту бар ҳамаи мушкилотат пирӯз мешавӣ".

Гуруҳи фаластинии "Ҳамос" эълон кард, ки ба тарҳи оташбаси Ғазза бо миёнаравии Амрико "бо руҳияи мусбат" посух додааст ва омодааст, то фавран музокирот дар мавриди иҷрои ин созишро оғоз кунад.

"Ҳамос" дар баёнияе, ки шоми 4 июл нашр шуд, дар бораи қабул ё ради тарҳи пешниҳодии Амрико ба таври возеҳ сухан нагуфтааст. "Ҳамос"-ро Амрико ва Аврупо созмони террористӣ қаламдод мекунанд.

Дар баёнияи "Ҳамос" омадааст, ки "пас аз баррасиҳои дохилӣ ва ҳамчунин бо дигар гурӯҳҳои фаластинӣ", посухи дорои "руҳияи мусбат" ба миёнаравҳо додааст.

"Ҳамос" айни замон таъкид кардааст, ки омода аст, то фавран вориди даври нав аз музокирот дар бораи шеваи амалӣ шудани ин тарҳ шавад.

Хабаргузории "Рейтерз" ба нақл аз расонаҳои исроилӣ гузориш додааст, ки мақомоти Исроил посухи "Ҳамос"-ро дарёфт кардаанд ва дар ҳоли баррасии ҷузъиёти он ҳастанд.

Президенти Амрико Доналд Трамп бо пешниҳоди оташбаси 60-рӯза, шомгоҳи панҷшанбе гуфт, интизор дорад, ки Исроил ва "Ҳамос" давоми 24 соати оянда посухи худро ироа кунанд.

Бенямин Нетаняҳу, нахуствазири Исроил, ки қарор аст рӯзи 7 июл дар Кохи Сафед бо Трамп дар Кохи Сафед дидор кунад, ҳанӯз дар мавриди изҳороти президенти Амрико изҳори назар накардааст. Ӯ чанд рӯз пеш гуфт, ки "мо мехоҳем гаравгонҳоро озод кунем".

Дар ҳамин ҳол, расонаҳо ба нақл аз манбаъҳои худ гузориш додаанд, ки "Ҳамос" хоҳони "тағйироти ҷузъӣ" дар тарҳи пешниҳодии оташбас аст. Як мақоми фаластинӣ ба "Рейтерз" гуфтааст, ки "нигарониҳое дар бораи кӯмакҳо, гузаргоҳи Рафаҳ ва шаффофият дар мавриди замони хуруҷуи нерӯҳои исроилӣ, вуҷуд дорад".

Гурӯҳи "Ҷиҳоди исломӣ", муттаҳиди "Ҳамос" низ гуфтааст, ки аз музокироти оташбас ҳимоят мекунад, аммо хостори "замонатҳо"-е аст, ки Исроил пас аз озодии гаравгонҳо, ҳамла ба Ғаззаро дигарбора оғоз накунад.

Ҷузъиёти тарҳи мавриди ҳимояти Амрико ба таври расмӣ эълон нашудааст, аммо расонаҳо ба нақл аз манбаъҳои худ, ба баъзе аз нуқтаҳои он ишора кардаанд.

Хабаргузории "Франс-пресс" ба нақл аз як манбаи фаластинии ошно бо музокирот гузориш дод, ки ин тарҳ шомили "оташбаси 60-рӯза аст, ки тайи он "Ҳамос" ниме аз асирони зиндаи исроилӣ дар Ғаззаро (ҳудуди 10 нафар) дар ивази раҳоии шуморе аз зиндониён ва боздоштшудаҳои фаластинӣ", озод хоҳад кард.

Хабаргузории "Рейтерз" низ ба нақл аз як мақоми огоҳ гузориш дод, ки ин тарҳ шомили озодии 10 гаравгони зинда ба ҳамроҳи ҷасадҳои 18 гаравгони дигар тайи оташбаси 60-рӯза аст.

Дар ҳамлаи "Ҳамос" ба Исроил дар рӯзи 7-уми октябри соли 2023, 1200 нафар исроилӣ кушта ва 251 тан ба гарав гирифта шуданд.

Аз замони оғози ҷанг ва дар пайи ҳамлаҳои Исроил ба Ғазза, беш аз 56 ҳазор фаластинӣ кушта шудаанд, ки аксари онҳо занон ва кӯдакон мебошанд. Мақомоти тандурустӣ дар Ғазза мегӯянд, ки беш аз 100 ҳазор нафар ҳам захмӣ ва ҳазорон тани дигар дар зери вайронаҳо нопадид ҳастанд.

Як кӯдаки шашмоҳа, ки аз сӯи модараш бо зарби корд захмӣ шуда буд, дар бемористони ноҳияи Шаҳритус фавтидааст.

Як масъул дар ҳукумати ноҳияи Қубодиён гуфт, ки субҳи 5 июл Хадича Ҳомидова ба хок супурда шуд. Ба гуфтаи манбаъҳои Радиои Озодӣ, Хадиҷа Ҳомидова аз ноҳияи шикам, болои китф ва дасташ, се корд хӯрда буд.

Табибон қаблан гуфта буданд, ки Хадиҷа Ҳомидова дар бахши эҳёгарии беморхонаи ноҳияи Шаҳритус қарор дорад.

Ҳодисаи ба корд захмӣ кардани кӯдакон дар ҷамоати деҳоти Вокпанти ноҳияи Қубодиён рӯзи 21-уми июн рух дод ва мақомот модари онҳо Юлдуз Бозороваи 24-соларо боздошт кардаанд.

Сабаби ба корд захмӣ кардани кӯдакон маълум нест. Гуфта мешавад, ки кӯдакон Муҳаммадҷони 5-сола, Исои 4-сола ва Ҳадиҷаи 6-моҳа аз оилаи Ҳомидовҳо, сокинони деҳаи Қизилнишони ноҳияи Қубодиён будаанд.

Феълан назари хонаводаи кӯдакон ва зани боздоштшуда маълум нест, вале як сокини деҳа ба Радиои Озодӣ гуфт, ки Юлдуз Бозорова як кӯдакро дар гаҳвора ва ду нафари дигарро дар рахти хоб захмӣ кард. Модари кӯдакон рӯзи ҳодиса аз сӯи мақомоти интизомӣ боздошт шуд.

Як ҳамсуҳбати Радиои Озодӣ аз деҳаи Қизилнишон гуфт, ки оилаи онҳо баҳс ё мушкили хонаводагӣ надошт ва падари кӯдакон хонаҳои мардумро таъмир мекард ва зиндагии осуда дошт.

Хабарҳои ғайрирасмӣ ин аст, ки ҳолати равонии ин зан хуб набудааст.

Феълан назари Умедҷон Ҳомидов, падари кӯдакон ва наздикони Юлдуз Бозорова, ки дар боздоштгоҳ аст, маълум нест.

Оҷонси байналмилалии энержии атомӣ расман эълон кард, ки гуруҳи бозрасони ин созмон аз Эрон берун шудааст.

Ин ниҳод рӯзи 4 июл дар паёме дар шабакаи Х хабар дод, ки бозрасонаш, ки давоми 12 рӯз ҳамлаҳои Исроил дар Теҳрон ҳузур доштанд, "сиҳат ва саломат" аз Эрон берун шудаанд.

Ҷумҳурии исломӣ аз қабл дастрасии бозрасони Оҷонси байналмилалии энержии атомиро маҳдуд карда буд ва ин гурӯҳ аз бозрасони Оҷонс, ки ахиран Эрон тарк карданд, иҷозаи вуруд ба таъсисоти ҳастаӣ барои арзёбии дақиқи хисороти бархоста аз ҳамлаҳои ҷанги 12-рӯзаро надоштанд.

Ин ниҳод ба нақл аз раиси худ Рафаэл Гросси дар идомаи паёмаш таъкид кардааст, ки ростозмоии фаъолиятҳои Эрон ва назорат бар ин фаъолиятҳо "аз аҳамияти муҳиме бархӯрдор аст".

Хабари хуруҷи бозрасони Оҷони байналмилалии энержии атомӣ аз Эрон ду рӯз пас аз он нашр мешавад, ки Масъуд Пизишкиён, раисҷумҳури Ҷумҳурии исломӣ қонуни "Боздоштани ҳамкорӣ бо Оҷонси байналмилалии энержии атомӣ"-ро имзо кард.

Амрико дар вокуниш ба ин тасмими Эрон, онро ғайри қобили қабул хонд.

Созмони ҷаҳонии тандурустӣ (WHO) аз кишварҳо хостааст, то андоз ё молиёт бар нушиданиҳои ширин ва алкулӣ ва маҳсулот аз тамокуро тайи 10 соли оянда 50 дарсад афзоиш диҳанд. Ин амр ҳам даромадани бахши беҳдошти умумиро афзоиш медиҳад ва ҳам истеъмоли ин маводи зарароварро коҳиш хоҳад дод.

Ба гуфтаи Созмони ҷаҳонии тандурустӣ, ин дархост, дар аввали моҳи июл дар нишасти СММ дар Испания садо дод. Ҳадаф он аст, ки то соли 2035 як триллион доллар даромад аз тариқи андозҳои тандурустӣ ҷамъоварӣ шавад.

Ин созмон мегӯяд, ки истеъмоли нушобаҳои ширин ва алкулӣ ва духониёт иртиботи мустақиме бо бемориҳое монанди диабет ва бархе саратонҳо дорад ва дар замоне, ки кумакҳои байналмилалӣ коҳиш ёфта, қарзҳои кишварҳо афзоиш ёфтааст, даромади ба дастомада аз ин молиёт метавон барои тақвияти системаҳои тандурустии кишварҳо истифода шавад.

Тедрос Гебрейесус, раиси Созмони ҷаҳонии тандурустӣ гуфт, ки ин молиёт ба кишварҳо кӯмак мекунад то бо "воқеияти нав" созгор шаванд ва хароҷоти ин бахшро таъмин кунанд.

Рӯзи 4 июл дар шаҳри Хонкендии Озарбойҷон мулоқоти президентони Тоҷикистон ва Эрон – Эмомалӣ Раҳмон ва Масъуди Пизишкиён барпо шуд. Ин аввалин дидори ду раҳбар ва ҳайатҳои ҳукуматии кишварҳо баъди ҷанги 12-рӯзаи Исроилу Эрон мебошад, ки дар ҳошияи ҷаласаи сарони кишварҳои узви Созмони ҳамкориҳои иқтисодӣ (СҲИ) мебошад.

Тоҷикистон дар низои моҳи июн дар Ховари Миёна аз Эрон пуштибонӣ ва ҳамлаҳои ИМА ва Исроилро интиқод кард. Сомонаи президент навишт, “Дар робита ба ҳодисаҳои ахири дар кишвари дӯст рухдода, ҳамдардии самимии Сарвари давлат ва мардуми Тоҷикистон ба кулли мардуми бародари Эрон иброз гардид”.

Каме дертар дар ҷараёни ҷаласаи СҲИ Раҳмон бо ёдоварӣ аз вазъ дар Ховари Миёна гуфт, ки Тоҷикистон "ҷонибдори коҳиши шиддатнокии вазъ ва барқарорсозии сулҳи пойдор дар Ховари Миёна танҳо бо роҳҳои сиёсиву дипломатӣ мебошад".

Ба навиштаи сомонаи президенти Тоҷикистон, ҳайатҳо ҳамкории ду кишварро баррасӣ карданд. Президенти Раҳмон гуфтааст, Тоҷикистон “ба таҳкиму густариши беш аз пеши робитаҳои гуногунҷанба бо Ҷумҳурии Исломии Эрон алоқаманд мебошад”. Ҷонибҳо ба зарурати идомаи ҳамкориҳо аз рӯи мувофиқаҳои гузашта таъкид кардаанд.

“Фаъолияти Неругоҳи обии Сангтуда-2 ва ҳалли босамари масъалаҳои марбут ба он намунаи неки ҳамкории Тоҷикистону Эрон арзёбӣ гардид”, омадааст дар хабар.

Душанбеву Теҳрон дар даҳ соли охир робитаи печидае доштанд. Тоҷикистон Эронро ба ҳимоят аз исломиёни мухолифи давлат муттаҳам мекард. Қарзи "Барқи тоҷик" аз нерӯгоҳи "Сангтӯда-2" ва сарнавишти пулҳои тоҷири эронӣ Бобаки Занҷонӣ, баҳси дигари тарафҳо буд. Соли 2019, пас аз имзо шудани санаде, робитаҳои ду кишвар тағйир ёфт ва рӯ ба гармӣ овард. Тоҷикистон дар садади истифодаи роҳҳои иртиботии Эрон ба хотири истифода аз бандари Чобаҳор аст.

Тоҷикистон ва Эрон моҳи феврали имсол раводид барои шаҳрвандони ҳамдигарро бекор карданд. Миёни Тоҷикистон ва Эрон феълан ҳафтае се парвоз ҳаст.

Инчунин рӯзи июл дидори президенти Тоҷикистон бо раҳбари Озарбойҷон Илҳом Алиев барпо шуд, ки мизбони ҷаласаи 17-уми СҲИ мебошад.

То 1 июл дар Тоҷикистон 41 ҳолати гирифтории ҳайвоноти хонагӣ ба бемории сӯхтанӣ сабт шудааст. Дар ин бора ба хабаргузории Азия-Плюс Наврӯз Ҷаъфаров, муовини сардори Раёсати бехатарии эпидемиологии Вазорати тандурустии Тоҷикистон хабар додааст.

Ҷаъфаров гуфтааст, ки ба истиснои ВМКБ ва Рашт, ҳолатҳои ошкоршавии бемории сӯхтанӣ (сибирская язва) дар дигар минтақаҳои кишвар сабт шудааст.

Мутахассис ин бемориро як «хатари мавсимие» номидааст, ки огаҳии ҷиддии сокинонро талаб мекунад, чун хатари аз ҷонварон ва инсон гузаштани он вуҷуд дорад.

Ӯ аз ҳама дастандаркорон, аз ҷумла, молдорон, қассобон, байторҳо ва дигарҳо даъват кардааст, ки гову гӯсфандҳои худро таҳти муоина қарор дода, бахусус пеш аз забҳ сиҳҳатии онро аз назар гузаронанд ва вақти куштани мол мутобиқ ба меъёрҳои санитарӣ амал кунанд.

Дар Озарбойҷон рӯзи 4 июл ҷаласаи 17-уми сарони давлатҳои аъзои Созмони ҳамкориҳои иқтисодӣ баргузор мешавад ва дар кори он, аз ҷумла, президенти Тоҷикистон Эмомалӣ Раҳмон ҳам ширкат мекунад. Раҳбари Тоҷикистон субҳи ҷумъа вориди шаҳри Боку шуд. Дар ҷаласаи 17-уми раҳбарони кишварҳои узви СҲИ инчунин мақомоти Афғонистон, Озарбойҷон, Эрон, Покистон, Қазоқистон, Узбекистон, Туркия ва Туркманистон иштирок мекунанд.

Дар иттилоияи расмии ин созмон гуфта шудааст, ки роҳҳои тавсеаи ҳамкориҳои иқтисодӣ дар маркази баррасиҳои ҷаласа қарор мегирад.

Ҷаласаи сарон ду рӯз - рӯзҳои 3 ва 4-уми июл дар шаҳри Хонкендии минтақаи Қаробоғи Озарбойҷон барпо мешавад.

Созмони ҳамкориҳои иқтисодӣ як ташкилоти минтақавии байнидавлатӣ буда, соли 1985 таъсис шудааст. Ба узвияти он Туркия, Покистон, Эрон, Афғонстон, Озарбойҷон, Узбекистон, Қазоқистон, Қирғизистон, Тоҷикистон ва Тоҷикистон шомил ҳастанд.

Ба иттилои расонаҳои мухталиф, дар ҳошияи ин ҷаласа бархе раҳбарони кишварҳо мулоқоти ҷудогонаи худро барпо мекунанд. Аз ҷумла, Ҳинду Покистон гуфтаанд, ки нахуствазирони ду кишвар бояд бо ҳам дидору гуфтугӯ кунанд ва ҳам мақомоти Туркманистон аз дидору гуфтугӯҳои вазири корҳои хориҷии ин кишвар Рашид Мередов ва муовини раиси ҳукумати Толибон Абдулғанӣ Бародар хабар додааст. Ҳамкориҳои энерживу мухобиротӣ мавзӯи марказии ин гуфтугӯҳо будааст.

Дар бораи мулоқотҳои ҳошиявии президенти Тоҷикистон Эмомалӣ Раҳмон феълан хабаре нашр намешавад, вале ба иттилои сомонаи президент, ӯро дар ин сафар вазири корҳои хориҷӣ, ёрдамчиёнаш оид ба робитаҳои хориҷӣ ва масъалаҳои иқтисодӣ, вазирони рушди иқтисоду савдо ва нақлиёт ҳамроҳӣ мекунанд.

Доналд Трамп, раисиҷумҳури Амрико баъд аз як суҳбати телефонӣ бо Владимир Путин, президенти Русия гуфт, "гуфтугу бо Путин ҳеҷ пешрафте ба бор надошт". Суҳбати телефонии президентҳои ду кишвар шоми 3 июл тақрибан як соат идома кард. Ба навиштаи Кремл, Трамп бори дигар масъалаи қатъи сареи амалиёти низомӣ дар Украинаро матраҳ кардааст. Дар посух Владимир Путин омодагии Русияро ба раванди музокира хабар дода, аммо таъкид кардааст, ки Маскав аз ҳадафҳои худ даст нахоҳанд кашид. Доналд Трамп ба расонаҳо хабар додааст, ки гуфтугӯ "ҳеҷ пешрафте надоштааст" ва ӯ аз вазъи Украина "қонеъ нест". Трамп дар посух ба суолҳои хабарнигорон ҳамчунин гуфтааст, ки Иёлоти Муттаҳида ба Украина силоҳи зиёде дода, ин корро дар оянда низ идома медиҳад. Санаи мушаххаси даври сеюми музокироти ҳайатҳои Русия ва Украина дар Истанбул ва мулоқоти шахсии Трамп ва Путин низ баррасӣ нашудааст. Ба навиштаи расонаҳо, ҷонибҳо дар ин суҳбат вазъи Эрон, Сурия ва умуман Ховари Миёнаро баррасӣ кардаанд.

Кумитаи давлатии амнияти миллии Қирғизистон аз боздошти як гуруҳи созмонёфтаи ҷиноие хабар дод, ки ба гуфтаи кумита ба қочоқи силоҳу муҳимоти ҷангӣ муттаҳам мешаванд.

Нӯҳ нафар аз узви ин гуруҳ ба он муттаҳам мешаванд, ки бо баҳонаи истифодаи аслиҳа дар замони муноқиша бо Тоҷикистон дар се соли пеш норинҷак ва дигар муҳимоти ҷангиро дуздида ба муштариёнашон мефурӯхтаанд.

Ба қавли Кумитаи амнияти миллии Қирғизистон яке аз аъзои гуруҳ аз афсарони феълӣ ва дигаре - узви собиқи неруҳои марзбонии кишвар будаанд. Дар баёнияи расмӣ омадааст, ки аз ин гуруҳ чаҳор норинҷак, туфанг ва дигар анвои тир мусодира кардаанд.

Маълум нест, ки боздошти ин афрод кай сурат гирифтааст ва назари худи муттаҳамон ба ҷиноятро наовардаанд.

Мақомоти Қубодиён мегӯянд, ду кӯдаке, ки модарашон онҳоро бо корд зада, захмӣ кард, сиҳат шудаанд, вале аҳволи тифли яксолаи ӯ бад аст ва дар бахши эҳёгарӣ зери назари табибон нигаҳ дошта мешавад.

Модари тифлон Юлдуз Бозороваи 24-сола дар боздошт аст ва маълум нест, ки чаро қасди ҷони кӯдаконаш кардааст. Як сокини деҳаи Қизилнишон ба Радиои Озодӣ гуфт, ки Юлдуз Бозорова рӯзи 21-уми июн як тифлашро дар гаҳвора ва ду нафари дигарро дар рахти хобашон захмӣ кардааст ва дигар аъзои хонавода хабардор шуда, онҳоро ба бемористон бурдаанд.

Ҷузъиёти дигари парвандаи ин зан феълан маълум нест.

Видеои се кӯдаки маҷруҳу бистарӣ чанде пеш дар шабакаҳои иҷтимоӣ чарх мезад ва хашму ҳайрати корбарони зиёдеро ба бор овард, кӣ чӣ гуна модаре қодир аст, чунин кореро дар ҳаққи фарзандони худ кунад.

Тифлони ӯ яке панҷ, дигарӣ 4-сола аст ва хурдӣ ҳанӯз яксола нашудааст. Модари кӯдаконро ҳамон рӯзи ҳодиса дастгир кардаанд.

Ин хабар дар ҳолест, ки бисёр сокинони Тоҷикистонро ҳодисаи ба дарё партофтани чор фарзанд аз ҷониби модарашон дар ноҳияи Фархор ваҳшатзада кардааст. Дар ин ҳодисаи мудҳиш кӯдакон ҳама нобуд шуда, модар зинда аз об берун ва мавриди боздошт қарор гирифтааст. Ин парванда аз рӯи моддаи "куштор" таҳқиқ мешавад.

Тибқи иттилои рӯзномаи фаронсавии Le Monde, рӯзи 23-юми июн дар маркази шаҳри Париж - пойтахти Фаронса, як шахси сарватманд ва намояндаи доираҳои бонуфузи молии Узбекистон — Каҳрамонҷон Олимови 48-сола рабуда шудааст.

Ӯ пас аз тақрибан ду рӯзи дар асорат буданаш баъди пардохти гаравпулие озод гардид. Мақомоти Фаронса ҳодисаро ҳамчун «гаравгонгирӣ аз ҷониби гурӯҳи муташаккил» арзёбӣ намуда, як гумонбарро боздошт ва таҳқиқи ҳодисаро ба роҳ монданд.

Каҳрамонҷон Олимов ягона саҳмдори “Анорбанк”-и Узбекистон аст. “Анорбонк”, ба гуфтаи мақомоти узбек, беш аз 1 миллиард доллар сармоя дар ихтиёр дорад ва яке аз 10 бонки пешсафи кишвар дониста мешавад.

Қаҳрамонҷон Олимов рӯзи 21-уми июн аз фурудгоҳи Тошканд ба Париж парвоз карда буд. Ба навиштаи Le Monde, рабояндагон афроди ношинос буда, Қаҳрамонҷон Олимовро аз фурудгоҳи Париж дар дохили мошине ба як виллаи хусусӣ дар наздикиҳои шаҳри Нитса бурдаанд. Ӯ онҷо зери латукӯби шадид қарор гирифт. Ба гуфтаи табибони бемористони «Отел-Дйё» дар Париж, ӯ ҷароҳатҳои зиёд бардошта бистарӣ гардид.

Ҳанӯз мақомоти Фаронса нагуфтанд, ки Олимов бар ивази чӣ миқдор пул озод гардид ва рабояндагонаш киҳо мебошанд. Аз рӯи ин парванда тафтишот идома дорад.

Подшоҳии Арабистони Саудӣ ва Фонди саудии рушд барои сохтмони нирӯгоҳи барқи обии “Роғун” 100 миллион ва ҳам барои амалисозии лоиҳаи сохтмони роҳи ҳалқавии шаҳри Кӯлоб 30 миллион доллари амрикоӣ ихтисос дод. Дар ин бора рӯзи 3 июл сомонаи президенти Тоҷикистон хабар додааст.

Дар ин замина рӯзи панҷшанбе мулоқоти президент Эмомалӣ Раҳмон бо Раиси Фонди Саудии Рушд Султон Абдурраҳмон Ал-Маршад баргузор шуд ва ҳамкории Тоҷикистон бо ин бунёд мавзӯи асосии гуфтугӯҳо будааст.

Манбаъ менависад, ки раҳбарияти Тоҷикистону Фонди саудии рушд “маблағгузории лоиҳаҳои муҳими соҳаҳои маориф, нақлиёт, тандурустӣ, гидроэнергетика ва идоракунии об”-ро баррасӣ карданд.

Тоҷикистон то чанд соли пеш дувумин кишвари бузурги кӯмакгиранда аз Маркази имдодии Шоҳи Саудӣ дониста мешуд. Арабистони Саудӣ ба Тоҷикистон миллионҳо доллар кӯмак кардааст.

Ройс Ламберт, як додраси ноҳиявӣ дар Амрико рӯзи 2-юми июл ба Оҷонси байнулмилалии расонаҳои Амрико ё USAGM дастур дод, ки буҷаи моҳи июни Радиои Аврупои Озод/Радиои Озодиро фавран дар ихтиёри ин расона гузорад.

Дар ҳукми худ додрас Оҷонсиро муваззаф кард, то маблағҳое, ки аз ҷониби Конгресс ба ин расона ҷудо шудаанд, барои моҳи июнро бипардозад.

Ин додрас гуфтааст, "USAGM тасмими музокира бо Радиои Озодиро надорад ва ҳеҷ гоҳ маблағҳои Конгрессро бидуни дахолати додгоҳ пардохт намекунад".

Ин тасмим дар ҳоле гирифта шуд, ки Радиои Озодӣ рӯзи 4-уми июл 75-умин солгарди нахустин пахши озмоишии худро ҷашн мегирад.

Рӯзи 14-уми март имсол USAGM ҳудуди 75 миллион доллар буҷаи Радиои Аврупои Озод/Радиои Озодиро барои моҳҳои март-сентябри соли 2025 боздошт.

Ин кор пас як дастури президент Доналд Трамп анҷом шуд, ки фармон дода буд харҷи кори ҳафт идора, азҷумла USAGM мувофиқи қонунҳо коҳиш дода шавад.

Радиои Аврупои Озод/Радиои Озодӣ ин корро "ғайриқонунӣ" хонд ва алайҳи USAGM иқдоми қонунӣ кард.

Дар назар аст, шурӯъ аз фардо, 4-уми июл парвозҳо аз Душанбе дар масири Машҳади Эрон аз сар гирифта шаванд. Дар ин бора аз ширкати ҳавопаймоии эронии "Varesh Airline" хабар доданд.

Аз ин ширкат гуфтанд, дар ҳоли ҳозир парвозҳо танҳо ба шаҳри Машҳад буда, ҳанӯз маълум нест, ки парвозҳо ба самти Теҳрон кай барқарор мешаванд. Қарор аст парвозҳо ба Машҳад ҳафтае ду маротиба – рӯзҳои сешанбе ва ҷумъа анҷом дода шаванд.

Дар пайи даргириҳо миёни Исроилу Эрон, парвозҳо дар фазои Эрон қатъ шуда буд. Ба шаҳрвандони Эрон, ки дар Тоҷикистон қарор доштанд, пешниҳод шуда буд, ки бо дарёфти раводиди Туркманистон тавассути роҳи заминии ин кишвар вориди Эрон шаванд.

Шаҳрвандони Тоҷикистон ҳам тавассути роҳҳои заминӣ аз тариқи Ашқобод ва Боку ба Тоҷикистон баргаштанд.

Бунгоҳи хабарию телевизионии Euronews дафтари намояндагии худро дар шаҳри Тошканд ифтитоҳ кард. Дар ин бора рӯзи 1 июл дафтари матбуоти ВКХ Узбекистон дар саҳифаи телеграмаш хабар додааст.

Дар хабар омадааст, ки “Euronews – яке аз расонаҳои боэътибори ҷаҳонӣ расман дар Тошканд боз шуд. Ин ҳодисаи муҳим баёнгари боз ва омода будани Узбекистон ба ҳамкориҳои байналмилалӣ аст ва шарики боэътимод будани он кишварро дар сатҳи ҷаҳонӣ намоиш медиҳад”.

Дар изҳороти расмӣ инчунин аксҳое аз маросими ифтитоҳи дафтари намояндагии ин расона нашр шудааст.

Ба иттилои дарёфтӣ, Euronews дар Тошканд як намояндагии Осиёи Марказии ин телевизион мешавад ва бештар дар мавзӯъҳои фарҳангу туризм барномаҳо таҳия хоҳад кард. Ҷузъиёти дигар феълан нашр намешавад, аз ҷумла ин ки оё дар Тоҷикистон ҳам дафтари намояндагӣ боз мекунад ё на.

Euronews як шабакаи бисёрзабонаи телевизионии Аврупо буда, қароргоҳаш дар шаҳри Лиони Фаронса ҷойгир аст. Барномаҳои онро, ки дар бораи ҳаводиси ҷаҳон ва кишварҳои ҷудогона, аз ҷумла Русия ва Украина ҳам мавод таҳия мекунад, тавассути маҳвора ва ҳам шабакаи YouTube дар интернет дидан мумкин аст.